ललितपुर । ललितपुर महानगरपालिकाको १०७औँ स्थापना दिवसको अवसरमा महानगरपालिका भित्रका संस्थागत विद्यालयतर्फ शैक्षिक सत्र २०८१ मा सञ्चालन गरिएको “एक विद्यालय, एक सम्पदा संरक्षण कार्यक्रम” अन्तर्गत उत्कृष्ट कार्य गर्दै प्रथम स्थान हासिल गर्न सफल माछापुच्छ्रे वर्ल्ड स्कुल, ललितपुर लाई नगद रु. १,००,००० (अक्षरूपी: एक लाख रुपैयाँ) सहित सम्मान–पत्र प्रदान गरिएको छ।

उक्त सम्मानप्रति विद्यालय परिवारले ललितपुर महानगरपालिकाप्रति हार्दिक आभार तथा कृतज्ञता व्यक्त गरेको छ। विद्यालयका अनुसार यस सम्मानले सम्पदा संरक्षणप्रतिको प्रतिबद्धतालाई अझ सुदृढ बनाएको छ र आगामी दिनमा ऐतिहासिक, सांस्कृतिक तथा स्थानीय सम्पदाको संरक्षणमा अझ सक्रिय भूमिका निर्वाह गर्ने प्रेरणा मिलेको छ।

ललितपुर महानगरपालिकाले बुधबार औपचारिक कार्यक्रमका साथ आफ्नो १०७औँ स्थापना दिवस मनाएको हो। समारोहमा प्रधानमन्त्री सुशीला कार्की, गृहमन्त्री ओमप्रकाश अर्याल लगायत विभिन्न विशिष्ट व्यक्तित्वहरूको उपस्थिति रहेको थियो।

समारोहलाई सम्बोधन गर्दै प्रधानमन्त्री कार्कीले वर्तमान अवस्थामा सुशासन र निर्वाचन दुई मुख्य एजेन्डामा सरकार केन्द्रित रहेको बताइन्। उनले भनिन्, “निर्वाचनमार्फत व्यक्त हुने नयाँ जनभावनाअनुरूपको सरकारलाई शक्ति हस्तान्तरण गर्न हामी आतुर छौँ। त्यसैले निर्वाचनलाई कम खर्चिलो, स्वच्छ, निष्पक्ष र भयरहित वातावरणमा सम्पन्न गर्न सबैले आ–आफ्नो ठाउँबाट सहयोग गर्नुपर्छ।” संविधानसम्मत, लोकतान्त्रिक विधि र सुशासनको मार्गमा देशलाई सुरक्षित रूपमा अघि बढाउने एक मात्र विकल्प निर्वाचन नै भएको उनको भनाइ थियो।

प्रधानमन्त्री कार्कीले समाजमा कुनै पनि किसिमको अराजकता स्वीकार्य नहुने स्पष्ट पार्दै शान्ति खलबल्याउने, कानुन हातमा लिने जस्ता अराजक तथा आपराधिक गतिविधि नियन्त्रण गर्न सुरक्षा प्रशासन सक्षम र सक्रिय रहेको बताइन्। साथै, खराब तत्त्वको प्रतिरोधका लागि सबैलाई हातेमालो गर्न आह्वान गरिन्।

स्थापना दिवसको अवसरमा प्रदान गरिएको यो सम्मानले विद्यालय तहबाटै सम्पदा संरक्षणमा सकारात्मक सन्देश प्रवाह भएको सहभागीहरूले बताएका छन्।