काठमाडौँ,  क्यानडाको एडमोन्टन, अल्बर्टामा अवस्थित नर्दर्न अल्बर्टा इन्स्टिच्युट अफ टेक्नोलोजी (एनएआईटी) का दक्षिण एसिया तथा मध्यपूर्व क्षेत्रीय प्रबन्धक रुपिन्दर परहार र इन्फाइनाइट ग्रुपका प्रतिनिधि इमरान गयासको उपस्थितिमा राजधानी काठमाडौँस्थित म्यारियट होटलमा इन्फाइनाइट ग्रुपद्वारा आयोजित नेटवर्किङ कार्यक्रम सफलतापूर्वक सम्पन्न भएको छ।

उक्त कार्यक्रमले शैक्षिक साझेदारी सुदृढ गर्ने, व्यावसायिक सम्पर्क सञ्जाल विस्तार गर्ने तथा अध्ययन र रोजगारीसम्बन्धी जानकारी आदानप्रदान गर्ने महत्वपूर्ण अवसर प्रदान गरेको आयोजकले जनाएको छ।

कार्यक्रममा इन्फाइनाइट ग्रुप नेपालका प्रबन्धक मनोज भट्टराईले सहभागीहरूलाई स्वागत गर्दै नेपाल र अन्तर्राष्ट्रिय साझेदार संस्थाबीच नयाँ सम्बन्ध स्थापना गर्न तथा विद्यार्थी र पेशेवरहरूका लागि नयाँ अवसरहरू सिर्जना गर्न यस प्रकारका कार्यक्रम महत्वपूर्ण हुने विश्वास व्यक्त गर्नुभयो।

कार्यक्रममा विभिन्न शैक्षिक कन्सल्टेन्सी संस्था, शिक्षा क्षेत्रका प्रतिनिधि तथा उद्योग क्षेत्रका व्यक्तित्वहरूको उल्लेखनीय सहभागिता रहेको थियो। सहभागीहरूले आपसी सहकार्य, अनुभव आदानप्रदान तथा भविष्यमा संयुक्त कार्यक्रमहरू सञ्चालन गर्ने विषयमा छलफल गरेका थिए।

कार्यक्रमका क्रममा एनएआईटी र इन्फाइनाइट ग्रुपबीच शैक्षिक सहकार्यका सम्भावनाहरू, निरन्तर शिक्षा कार्यक्रम, अप्रेन्टिसशिप (सीपमूलक तालिम) का अवसरहरू तथा क्यानडा–नेपालबीच पेशागत आदानप्रदानका विषयमा विस्तृत छलफल गरिएको थियो।

इन्फाइनाइट ग्रुप नेपालका प्रबन्धक भट्टराईले आगामी दिनमा यस्ता नेटवर्किङ कार्यक्रमहरूलाई अझ विस्तार गर्दै व्यवहारिक साझेदारी तथा विद्यार्थीहरूका लागि प्रत्यक्ष मार्गनिर्देशन प्रदान गर्ने योजना रहेको जानकारी दिनुभयो।

कार्यक्रमको अन्त्यमा आयोजक संस्थाले सहभागी सबै अतिथि तथा संस्थागत प्रतिनिधिहरूलाई धन्यवाद ज्ञापन गर्दै कार्यक्रम औपचारिक रूपमा समापन गरिएको थियो।

Additional News https://24newsfire.com/archives/24004/