काठमाडौं – ‘द नलेज नेटवर्क’को आयोजनामा हिजो काठमाडौंस्थित होटल र्‍याडिसनमा ‘आईसीसी नेटवर्किङ मिटिङ’ भव्यताका साथ सम्पन्न भएको छ। कार्यक्रममा नेपालका प्रतिष्ठित शैक्षिक परामर्शदाताहरू र भारतका विभिन्न विश्वविद्यालयका प्रतिनिधिहरूबीच बीटूबी (B2B) नेटवर्किङ र दक्षिण एसियाली वैदेशिक शिक्षाका उदीयमान प्रवृत्तिहरूका बारेमा विस्तृत छलफल भएको थियो।

कार्यक्रममा डी.वाई. पाटिल इन्टरनेशनल युनिभर्सिटीका भर्ना निर्देशक डा. अनुराग आनन्द पाण्डेले नेपाली विद्यार्थीहरूका लागि अन्तर-विषय अनुसन्धानका अवसरहरू बढ्दै गएको बताउनुभयो। त्यस्तै, सुराना एजुकेसनल इन्स्टिच्युसनका सहायक प्राध्यापक मणि के.आर. ले विश्वबजारमा बिक्ने जनशक्ति तयार गर्न उद्योग-केन्द्रित पाठ्यक्रमको आवश्यकता रहेको उल्लेख गर्नुभयो। जेआईएस (JIS) ग्रुपका वरिष्ठ मार्केटिङ म्यानेजर प्रशान्त शर्माले प्रविधिमा आधारित शिक्षामा आफ्नो समूहले गरिरहेको लगानीबारे जानकारी दिनुभयो भने डा. सी.भी. रमन विश्वविद्यालयका भर्ना निर्देशक देवेन्द्र पी.एस. यादवले सार्क राष्ट्रका विद्यार्थीहरूका लागि उपलब्ध छात्रवृत्ति योजनाहरूबारे प्रस्ट पार्नुभयो।

अन्तर्राष्ट्रिय भर्ना प्रक्रियाका बारेमा बोल्दै पिम्परी चिंचवाड विश्वविद्यालयकी इन्टरनेशनल एडमिसन म्यानेजर रचना पाहुजाले विदेशी विद्यार्थीहरूका लागि सरल भर्ना प्रक्रियाबारे जानकारी दिनुभयो। इस्ट पोइन्ट ग्रुप अफ इन्स्टिच्युसनका प्रतिनिधि सुदन चौहानले बैंगलोरमा रहेको आफ्नो संस्थाको भौतिक पूर्वाधार र रोजगारीका अवसरहरूबारे चर्चा गर्नुभयो। एमएमयू (MMU) का वरिष्ठ प्रबन्धक अंकुर गोयलले स्वास्थ्य र प्राविधिक शिक्षामा आफ्नो विश्वविद्यालयको उत्कृष्टताका बारेमा धारणा राख्नुभयो भने सिमाट्स (SIMATS) इन्जिनियरिङ (सविथा) का इन्टरनेशनल अफेयर्स एशोसिएट डिन डा. दीपक अरुण अन्नामलाईले अनुसन्धान र विश्वव्यापी र्‍याङ्किङमा आफ्नो संस्थाको स्थानबारे प्रकाश पार्नुभयो।

एजीसी (AGC) प्रालिका निर्देशक तमल कृष्ण चक्रवर्तीले विद्यार्थीहरूको सफलताका लागि सहयोगी संयन्त्रको महत्त्वबारे बोल्नुभएको थियो। कार्यक्रमको अन्त्यमा आईसीसी (द नलेज नेटवर्क) का निर्देशक विकास त्रिवेदीले सबै सहभागीहरूलाई धन्यवाद ज्ञापन गर्दै यस्ता कार्यक्रमले परामर्शदाताहरूलाई सही सूचना प्रदान गर्न र विद्यार्थीहरूको भविष्य उज्ज्वल बनाउन मद्दत पुग्ने विश्वास व्यक्त गर्नुभयो।