काठमाडौँ, कात्तिक १४ (अक्टोबर ३०) — ‘काठमाडौँ हरर फिल्म फेस्टिभल (KHFF 2026)’ को दोस्रो संस्करण आजदेखि कमलपोखरीस्थित रसियन हाउसमा भव्य उद्घाटन समारोहका साथ आधिकारिक रूपमा सुरु भएको छ। नेपाल चलचित्र तथा सांस्कृतिक एकेडेमी (NFCA) को आयोजना, भेन्यू पार्टनर रसियन हाउस काठमाडौँ, सपोर्टिङ पार्टनर सिनेमेकर्स तथा टिकटिङ पार्टनर आईएमई खल्तीको सहकार्यमा आयोजित यो तीन दिने महोत्सवले विश्वभरका हरर विधाका चलचित्रकर्मी र सिनेमाप्रेमीहरूलाई एकै ठाउँमा जोडेको छ। औपचारिक सत्रको सुरुवात कार्यक्रम सञ्चालकको परिचयबाट भएको थियो भने प्रमुख अतिथि र विशिष्ट अतिथिहरूले दीप प्रज्वलन गरी महोत्सवको औपचारिक उद्घाटन गर्नुभएको थियो।

समारोहमा चलचित्र विकास बोर्डका नवनियुक्त अध्यक्ष मनिष पण्डित प्रमुख अतिथिका रूपमा सहभागी हुनुहुन्थ्यो। उहाँका साथमा अन्तर्राष्ट्रिय कूटनीतिज्ञ र स्थानीय चलचित्र क्षेत्रका दिग्गज व्यक्तित्वहरूको सहभागिता रहेको थियो, जसमा जापानी दूतावासका डेपुटी चिफ अफ मिसन यासुहारु शिन्तो, रसियन हाउस काठमाडौँकी निर्देशक अनास्तासिया खोख्लोभा, ब्राजिलियन दूतावासका काउन्सिलर सर्जियो एफसी काउटो, पाकिस्तानी दूतावासका प्रथम सचिव (प्रेस तथा संस्कृति) वाकास अहमद, बागमती प्रदेशका सञ्चार रजिस्ट्रार रेवती सापकोटा, नेपाल चलचित्र तथा सांस्कृतिक एकेडेमीका अध्यक्ष के.पी. पाठक, नेपाल कलाकार सङ्घका अध्यक्ष उत्तम केसी र नेपाल चलचित्र सङ्घका उपाध्यक्ष गोपाल काजी कायस्थ लगायत हुनुहुन्थ्यो।

उद्घाटन समारोहमा रसियन हाउसकी निर्देशक अनास्तासिया खोख्लोभाले स्वागत मन्तव्य व्यक्त गर्नुभएको थियो भने प्रमुख अतिथि एवं चलचित्र विकास बोर्डका अध्यक्ष मनिष पण्डितले आफ्नो मन्तव्य राख्नुभएको थियो। उद्घाटन सत्रमा सांस्कृतिक तथा सङ्गीतिक प्रस्तुतिहरू पनि समावेश थिए, जसमा नेपाल-रसियन युथ क्लबका पियानोवादक सार्थक मानन्धरले प्योत्र त्चाइकोभस्कीको ‘स्वान लेक’ र इगोर कोर्नेल्युकको ‘द मास्टर एन्ड मार्गरिटा’ को थिममा आधारित क्लासिकल पियानो सोलो प्रस्तुत गर्नुभएको थियो भने साथमा परम्परागत नेपाली ‘लाखे नाच’ पनि प्रदर्शन गरिएको थियो।

महोत्सव निर्देशक रसिक पाठकले धन्यवाद मन्तव्यसहित समापन गर्दै उद्घाटन चलचित्र ‘इन दिस डार्कनेस आई सी यु’ (In This Darkness I See You) को परिचय गराउनुभयो। नदिम ताबतद्वारा निर्देशित ८५ मिनेट लामो यो साइकोलोजिकल थ्रिलर चलचित्र लेबनान, फ्रान्स, कतार र साउदी अरेबियाको संयुक्त निर्माण हो, जसले बोक्सी वा प्रेतात्मा रहेको ठानिएको एक निर्माण स्थलमा सिरियाली कामदार र लेबनानी गाउँलेहरूबीचको तनावको कथा प्रस्तुत गर्दछ। नोभेम्बर १ (कात्तिक १६) सम्म चल्ने यस महोत्सवमा अन्तर्राष्ट्रिय हरर सर्ट फिल्म भ्लगहरू र फिचर फिल्महरूको बाक्लो तालिका रहेको छ र आइतबार साँझ पुरस्कार वितरण तथा समापन समारोहका साथ महोत्सव समापन हुनेछ।