हाम्रो राष्ट्र
वाग्नरका सेना प्रमुख येभगेनी प्रिगोजिनले गत हप्ता भएको विद्रोहमा रूसी सेनाका प्रमुखलाई कब्जा गर्ने लक्ष्य राखेको पाइएको छ । न्यूयोर्क शहरबाट प्रकाशित अन्तर्राष्ट्रिय दैनिक पत्रिका वाल स्ट्रिट जर्नलले रुसी सेनाले वाग्नरका सेना प्रमुखको योजनाबद्ध विद्रोहलाई प्रारम्भिक चरणमा नै थाहा पाई कब्जाबाट जोगिएको दाबी गरेको छ ।
जर्नलले पश्चिमी अधिकारीहरूलाई उदृत गर्दै प्रिगोजिनले रूसी रक्षामन्त्री सर्गेई शोइगु र चिफ अफ स्टाफ जनरल भ्यालेरी गेरासिमोभलाई दक्षिणको भ्रमणमा रहेका बेला कब्जामा लिन खोजेका दाबी गरेको हो । तर रूसी घरेलु गुप्तचर सुरक्षा सेवा (एफएसबी)ले उक्त योजनाबारे थाहा पाएपछि शोइगु र गेरासिमोभले आफ्नो यात्रा परिवर्तन गरेको जर्नलले उल्लेख गरेको छ ।
यसले प्रिगोजिनलाई चाँडै विदेशी भूमिमा पलायन हुनु बाध्य बनाएको उसले बताएको छ । शुक्रबार उनको वाग्नर सेनाले रोस्तोभ–अन–डोनमा रूसी दक्षिणी सैन्य जिल्लाको मुख्यालयलाई नियन्त्रणमा लिएको थियो ।
यो युक्रेनमा युद्धको लागि बन्दोबस्ती र सैन्य सामग्री आपूर्तिका लागि एक प्रमुख केन्द्र हो । रूसी नेसनल गार्डका कमाण्डर भिक्टर जोलोतोभले वाग्नरबाट विद्रोहका बारेमा जानकारी आएको र यसका पछाडि पश्चिमा एजेन्टको हात रहेको हुन सक्ने बताएका छन् ।
© 2026 All right reserved to hamrorastra.com | Site By : SobizTrend
