हाम्रो राष्ट्र
एसियाली विकास बैंक (एडीबी) ले खाद्य तथा इन्धनको मूल्यवृद्धि र कोरोना भाइरसको महामारीले गत वर्ष विकासशील एसियाका करिब सात करोड मानिसलाई चरम गरिबीतर्फ धकेलेको उल्लेख गरेको छ ।
सन् २०१७ को मुद्रास्फीतिमा समायोजित मूल्यका आधारमा मनिलास्थित यो ऋणदाताले दैनिक २ दशमलव १५ डलरभन्दा कम खर्चमा जीविका चलाउनुलाई चरम गरिबीका रूपमा परिभाषित गरेको छ ।
एडीबीका प्रमुख अर्थशास्त्री अल्बर्ट पार्कले जारी गरेको विज्ञप्तिमा एशिया प्रशान्त क्षेत्र कोभिड–१९ को महामारीबाट निरन्तर सुधार भइरहेको तर जीवनयापनको बढ्दो सङ्कटले गरिबी उन्मूलनतर्फको प्रगतिलाई कमजोर बनाइरहेको उल्लेख छ ।
सन् २०२२ मा अनुमानित १५ करोड ५२ लाख मानिस चरम गरिबीमा बाँचिरहेका थिए, जुन महामारी र उच्च खर्चबिनाको जीवनयापनभन्दा ६ करोड ७८ लाख बढी हो । एडीबीका अनुसार महामारीले सन् २०२० मा सात करोड ५० लाखदेखि आठ करोडभन्दा बढी मानिसलाई चरम गरिबीमा धकेलेको छ ।
© 2026 All right reserved to hamrorastra.com | Site By : SobizTrend
