उत्तर कोरियाले दक्षिण कोरियाको सैन्य अखडाहरू लक्षित दुई छोटा दूरीका बलिस्टिक क्षेप्यास्त्र प्रहार गरेको जनाएको छ । त्यसलाई ती निशानामा पारमाणविक आक्रमणको नमुनाका रूपमा पनि हेरिएको बताइएको छ ।

त्यहाँका सरकारी सञ्चारमाध्यमका अनुसार उक्त क्षेत्रमा अमेरिकाले रणनीतिक बमवर्षक विमान तैनाथ गरेको घटनाविरुद्ध चेतावनी स्वरूप उक्त परीक्षण गरिएको हो । दक्षिण कोरियाले दुई वटा क्षेप्यास्त्रहरू समुद्रमा खसेको जानकारी दिएको छ । दक्षिण कोरिया र अमेरिकाले वार्षिक रूपमा हुने संयुक्त सैन्य अभ्यास गरिरहेका बेला यो प्रक्षेपण गरिएको हो ।

प्योङयाङले लामो समयदेखि उक्त अभ्यासलाई युद्ध पूर्वाभ्यासको रूपमा व्याख्या गर्दै आएको छ । उत्तर कोरियाली सेनाले भनेको छ, ‘क्षेप्यास्त्र बुधबार अबेर प्रहार गरिएको हो। र त्यो दक्षिण कोरियाका ‘विभिन्न प्रमुख अखडाहरूमा रणनीतिक पारमाणविक अभ्यास गर्दा कस्तो हुन्छ भन्ने दर्शाउन गरिएको हो।’

अमेरिका र दक्षिण कोरियाको एघार दिनसम्म चलेको संयुक्त सैन्य अभ्यास समाप्त हुनुभन्दा एक दिनअघि यो क्षेप्यास्त्र प्रक्षेपण गरिएको हो । दक्षिण कोरियाली सञ्चारमाध्यमका अनुसार उक्त अभ्यासमा कम्तीमा एउटा अमेरिकी बी–१बी रणनीतिक बमवर्षक विमान कोरियाली प्रायद्वीपमाथि उडेको बताइएको छ ।

मङ्गलवार उत्तर कोरियाका शीर्ष नेता किम जोङ अनले आफ्ना प्रमुख कमान्डरहरूलाई दक्षिण कोरियासँगको युद्धका लागि तयारी गर्न भइरहेको अभ्यास अवलोकन गरेका थिए।