हाम्रो राष्ट्र
काठमाडौं । प्रधानमन्त्री पुष्पकमल दाहाल प्रचण्डले आफ्नो चीन भ्रमण सफल भएको बताएका छन् । शनिबार स्वदेश फर्केपछि त्रिभुवन अन्तर्राष्ट्रिय विमानस्थलमा पत्रकारहरुसँग कुरा गर्दै प्रधानमन्त्रीले नेपालको विकासको प्रयासमा चीनसँगको साथका विषयमा खुलेर कुरा भएको बताएका हुन् ।
उनले द्विपक्षीय भेटवार्ताले नेपाल–चीन सम्बन्धलाई उचाई दिन र विगतका सम्झौता कार्यान्वयन गर्न मद्दत पुगेको बताए । उनले चीन भ्रमणले दुई देशबीच आपसी विश्वास बढेको समेत बताए ।
प्रधानमन्त्रीले चिनियाँ समकक्षीबीच भएको वार्ताले नेपालको उत्तरीसीमा प्रशारण लाइन, सौर्य प्रणाली जडान, सीमा नाका पुन : सञ्चालन, कृषि, पोखरा विमानस्थलमा चीनका शहरबाट हवाई सञ्चालन गर्ने लगायतको सम्झौता भएको बताए। उनले विभिन्न १२ वटा सम्झौतामा हस्ताक्षर गरेको जानकारी दिए ।
उनले भने, ‘चीनका राष्ट्रपति र प्रधानमन्त्रीसँगको द्विपक्षीय भेटवार्तापश्चात नेपाल–चीनबीचको सम्बन्ध थप उचाई दिन मद्दत पुगेको छ। चीन र नेपालबीच विगतमा भएका समझदारी कार्यान्वयन गर्दै लैजाने प्रतिबद्धता व्यक्त भएको छ।’
भ्रमणका उपलब्धिलाई प्रधानमन्त्रीले ४० बुँदामा समेटेका छन् । प्रधानमन्त्री भदौ ३० गते अमेरिका उडेका थिए भने उतैबाट असोज ५ गते चीन पुगेका थिए ।
© 2026 All right reserved to hamrorastra.com | Site By : SobizTrend
