काठमाडौँ। The Higher Education and Secondary Schools’ Association Nepal (HISSAN) ले आगामी २०८२ फागुन २१ (मार्च ५, २०२६) मा हुने प्रतिनिधिसभा निर्वाचनका लागि तयारी हुँदै गरेका राजनीतिक दलका घोषणापत्रमा शिक्षालाई उच्च प्राथमिकता दिन आग्रह गरेको छ।

मंगलबार आयोजित पत्रकार सम्मेलनमार्फत हिसानले देशको समग्र शिक्षा क्षेत्रलाई नयाँ ढंगले अघि बढाउन आवश्यक रहेको उल्लेख गर्दै निजी क्षेत्रको लगानीको सुरक्षा सुनिश्चित गरिनुपर्नेमा जोड दिएको छ। यसका लागि राजनीतिक दलहरूले जिम्मेवार र परिपक्व भूमिका निर्वाह गर्नुपर्ने हिसानको भनाइ छ।

पत्रकार सम्मेलनमा बोल्दै हिसानका अध्यक्ष Yuvraj Sharma ले देशको विकास र समृद्धि राजनीतिक नेतृत्वको सोच, योजना र कार्यक्रमसँग प्रत्यक्ष जोडिएको उल्लेख गरे। “त्यसैले सबै राजनीतिक दलले आफ्नो निर्वाचन घोषणापत्र र प्रतिबद्धता दस्तावेजमा राष्ट्रिय शिक्षालाई केन्द्रमा राख्न आवश्यक छ,” उनले भने।

अध्यक्ष शर्माले गुणस्तरीय, रोजगारीमुखी तथा जीवनोपयोगी शिक्षा देशभित्रै सम्भव रहेको उल्लेख गर्दै त्यसका लागि घोषणापत्रमा समावेश गर्नु मात्र नभई सरोकारवालाको सहकार्यमा प्रभावकारी कार्यान्वयन आवश्यक रहेको बताए।

हिसानले शिक्षामा लगानी वृद्धि गर्न, विद्यालय शिक्षा ऐन, उच्च शिक्षा ऐन तथा प्राविधिक शिक्षासम्बन्धी ऐन शीघ्र ल्याउन राजनीतिक दलहरूले प्राथमिकता दिनुपर्ने माग गरेको छ।

त्यसैगरी पत्रकार सम्मेलनमा हिसानका महासचिव Ramhari Silwal ले देशको शिक्षा क्षेत्रको करिब एक–तिहाइ हिस्सा निजी क्षेत्रले धानेको भए पनि निजी शैक्षिक संस्थाका लगानी र सुरक्षासम्बन्धी व्यवस्था अझै सुनिश्चित नहुँदा चिन्ता बढेको बताए।

हिसानले ठूला लगानी, व्यापक पूर्वाधार र दक्ष शैक्षिक जनशक्ति हुँदाहुँदै पनि उच्च शिक्षाका लागि विद्यार्थी विदेशिने क्रम बढिरहेकाले सरकार, शिक्षा, विज्ञान तथा प्रविधि मन्त्रालय, विश्वविद्यालय र क्याम्पसहरू थप जिम्मेवार हुनुपर्ने माग पनि गरेको छ।

साथै, २०८२ भदौ २३ र २४ गते भएको आन्दोलनका क्रममा निजी शैक्षिक संस्थाहरूलाई करिब १ अर्ब ५० करोड रुपैयाँ बराबरको क्षति पुगेको जानकारी पनि हिसानले दिएको छ।