हाम्रो राष्ट्र
पोखरा। नेपालका लागि पाकिस्तानका राजदूत महामहिम मोहम्मद आमिर खानले गण्डकी प्रदेशका मुख्यमन्त्री सुरेन्द्रराज पाण्डेसँग पोखरामा भेटवार्ता गर्नुभएको छ। भेटमा नेपाल र पाकिस्तानबीचको मैत्रीपूर्ण तथा सौहार्दपूर्ण सम्बन्धलाई थप सुदृढ बनाउने विषयमा विचार आदानप्रदान भएको छ।
भेटका क्रममा गण्डकी प्रदेश र पोखरासँगको सहकार्यलाई पर्यटन, कृषि, शिक्षा, स्वास्थ्य, स्टार्टअप तथा व्यापारलगायतका प्रमुख क्षेत्रमा विस्तार गर्ने विषयमा छलफल भएको थियो।
राजदूत खानले नेपाल र पाकिस्तानबीच लामो समयदेखि कायम रहेको मित्रता तथा दुवै देशको साझा सांस्कृतिक, बौद्ध र हिन्दू सम्पदाको महत्त्वलाई उल्लेख गर्नुभयो। उहाँले सांस्कृतिक आदानप्रदानलाई प्रवर्द्धन गर्दै दुई देशका नागरिकबीचको सम्बन्धलाई थप मजबुत बनाउनुपर्नेमा जोड दिनुभयो।
भेटवार्ताले नेपाल–पाकिस्तान सम्बन्धलाई थप सुदृढ बनाउँदै गण्डकी प्रदेश र पोखरासँग विभिन्न क्षेत्रमा सहकार्यका नयाँ सम्भावनाहरू पहिचान गर्न सहयोग पुग्ने अपेक्षा गरिएको छ।
© 2026 All right reserved to hamrorastra.com | Site By : SobizTrend
