जापानको हिरोशिमाका २३ जना बासिन्दाले सन् १९४५ मा भएको आणविक बम विस्फोटपछि रेडियोधर्मी ‘कालो वर्षा’को शिकार भएको आफ्नो हैसियतलाई मान्यता दिन माग गर्दै हिरोशिमा जिल्ला अदालतमा मुद्दा दायर गरेका छन् ।

शुक्रबार मुद्दा दायर गरेको मुद्दामा ७० देखि ९० वर्ष उमेर समूहका वादीहरूले ‘कालो वर्षा’को दायरा सरकारको दाबीभन्दा निकै फराकिलो भएको र यउनीहरू रेडियोधर्मी वर्षाको चपेटामा परेको पाइएमा उनीहरू बिरामी भए वा नभए पनि पीडितका रूपमा पहिचान गरिनुपर्ने तर्क गरेका छन् ।

सन् १९४५ मा हिरोशिमा र नागासाकीमा अमेरिकी आणविक बम विष्फोट भएपछि भएको बर्षा (ब्ल्याक रेन) भनेको आणविक पतन वा रेडियोधर्मी कालो वर्षा हो । ‘ब्ल्याक रेन’ वा पानीले भिजेको र त्यसबाट दूषित अन्नबाली खाँदा मानिस रोगबाट पीडित हुन्छन् ।

जापानी सरकारले आणविक विष्फोटबाट रेडियोधर्मी रूपमा दूषित क्षेत्रहरूलाई ‘कालो वर्षा’ को अवधि र दायराअनुसार भारी वर्षा क्षेत्र र हल्का वर्षा क्षेत्रहरूमा विभाजन गरेको थियो । कानून अनुसार भारी वर्षा क्षेत्रहरूमा विकिरण–सम्बन्धित रोगहरूबाट पीडित बासिन्दाहरूलाई मात्र आणविक विस्फोटको शिकारको रूपमा पहिचान गरिएको र सम्बन्धित राज्य उपचारमा पहुँच दिइएको थियो ।

जुलाई २०२१ मा, हिरोशिमा उच्च अदालतले सुनाएको फैसलामा हिरोशिमा प्रान्तका ८४ व्यक्तिहरूले राज्यको स्वास्थ्य हेरचाहसम्बन्धी लाभहरू प्राप्त गर्न योग्य भएको निर्णय सुनाइएको थियो । यद्यपि उनीहरू सरकारद्वारा मान्यता प्राप्त क्षेत्रभन्दा बाहिरको ‘कालो वर्षा’ को सम्पर्कमा थिए ।

यस निर्णयपछि जापान सरकारले अप्रिल २०२२ मा दुई आवश्यकताहरू पूरा गर्ने व्यक्तिहरूलाई आणविक बमबाट बचेको प्रमाणपत्र प्रदान गर्ने एक नयाँ योजना सुरु गरेको थियो ।g