हाम्रो राष्ट्र
काठमाडौं । प्रधानमन्त्री पुष्पकमल दाहाल प्रचण्डले कुनै घटनाक्रमलाई लिएर प्रधानमन्त्री र मन्त्रीहरुको राजीनामा माग्ने गलत संस्कार बसाल्न खोजिएको बताएका छन् ।
शुक्रबार बिहान इटालीको रोमबाट फर्किएपछि त्रिभुवन अन्तर्राष्ट्रिय विमानस्थलमा पत्रकारहरुसँग कुरा गर्दै प्रधानमन्त्रीले राजनीतिक उद्देश्यका निम्ति अत्तनपत्त प्रधामन्त्री, अर्थमन्त्री र गृहमन्त्रीको राजीनामा मागीहाल्ने संस्कार राम्रो नभएको बताएका हुन् ।
उनले भने, ‘राजनीतिक उद्देश्यको निम्ति हत्त न पत्त प्रधानमन्त्रीको राजीनामा मागिहाल्ने, अर्थमन्त्रीको राजीनामा मागिहाल्ने, गृहमन्त्रीको राजीनामा मागिहाल्ने संस्कार बसाल्न खोजिएको छ, त्यो राम्रो होइन । प्रधानमन्त्री, अर्थमन्त्री, गृहमन्त्रीको स्पष्टीकरण दिने मौका पनि नदिई राजीनामा दिने भए देऊ नत्र सदन चल्न दिँदैनौँ भनेर पहिले घोषणा गर्ने राजनीति कल्चरले हामीलाई राम्रो ठाउँतिर लाँदैन ।’
प्रधानमन्त्रीले विमानस्थलबाट बरामद भएको सुन र पछिल्लो राजनीतिक विषयमा उपप्रधानमन्त्री, मन्त्रीहरूसँग कुरा गरेर मात्र भन्न सक्ने बताए ।
त्रिभुवन विमानस्थलबाट एक क्वीन्टल सुन बाहिरिएको घटनालाई लिएर प्रमुख प्रतिपिक्षी नेकपा एमालेले गृहमन्त्री र अर्थमन्त्रीको राजीनामा तथा उच्चस्तरीय छानबिन समिति गठनको माग गर्दै सदन अवरुद्ध गर्दै आएको छ । उसले आफ्ना यी माग पूरा नभए सदन चल्न नदिने बताएको छ ।
© 2026 All right reserved to hamrorastra.com | Site By : SobizTrend
