काठमाडौं। नेपाल सरकार ले हालै बसेको मन्त्रिपरिषद् बैठकका महत्वपूर्ण निर्णयहरू सार्वजनिक गरेको छ। बैठकले आन्दोलनका शहीदलाई सम्मान व्यक्त गर्ने, सरकारी प्रवक्ता तोक्ने, शासकीय सुधारको कार्यसूची स्वीकृत गर्ने लगायतका निर्णय गरेको हो।

सार्वजनिक गरिएको निर्णयअनुसार भदौ २३ र २४ गते भएको जेनेजी आन्दोलन तथा यसअघि भएका विभिन्न आन्दोलनका सम्पूर्ण ज्ञात–अज्ञात शहीदहरूप्रति सम्मान तथा श्रद्धाञ्जली व्यक्त गर्ने निर्णय गरिएको छ।

त्यसैगरी, नेपाल सरकारको प्रवक्तामा माननीय शिक्षा, विज्ञान तथा प्रविधिमन्त्रीलाई तोक्ने निर्णय पनि मन्त्रिपरिषद्ले गरेको छ।

बैठकले सरकारको शासकीय सुधारसम्बन्धी सय दिने कार्यसूची स्वीकृत गर्ने निर्णय समेत गरेको छ। उक्त कार्यसूची भोलिसम्म सार्वजनिक गर्ने तयारी सरकारको रहेको जनाइएको छ।

यस्तै, भदौ २३ र २४ गते भएको प्रदर्शनका क्रममा भएका घटनाको छानबिन गर्न गठित आयोगले सरकारसमक्ष पेश गरेको प्रतिवेदन कार्यान्वयन गर्ने निर्णय पनि मन्त्रिपरिषद्ले गरेको छ। उक्त आयोग गोरबहादुर कार्की को अध्यक्षतामा गठन गरिएको थियो।

सरकारले आयोगको सिफारिसअनुसार व्यक्तिहरू र निकायमाथि आवश्यक अध्ययन गर्न सुरक्षा निकायको हकमा अध्ययन समिति गठन गर्ने र सो समितिले पेश गरेको सिफारिसका आधारमा कारबाही गर्ने निर्णय गरेको छ। अन्य सिफारिसहरू भने तत्काल कार्यान्वयन गर्ने निर्णय गरिएको सरकारद्वारा जारी सूचनामा उल्लेख छ।

सरकारका यी निर्णयहरूलाई आन्दोलनका विषय, सुशासन र प्रशासनिक सुधारसँग जोडेर महत्वपूर्ण रूपमा हेरिएको छ। मन्त्रिपरिषद्का निर्णयहरू कार्यान्वयनमा गएसँगै सरकारको आगामी कार्यदिशा थप स्पष्ट हुने अपेक्षा गरिएको छ।