काठमाडौं, चैत १४ — नेपाल सरकारका माननीय गृहमन्त्री सुधन गुरुङ ज्यूले आज उपत्यका ट्राफिक प्रहरी कार्यालयको अनुगमन गर्नुभएको छ। अनुगमनका क्रममा गृहमन्त्री गुरुङले काठमाडौं उपत्यकाको ट्राफिक व्यवस्थापन, सडक सुरक्षा, सवारी चाप व्यवस्थापन तथा ट्राफिक नियम कार्यान्वयनको अवस्थाबारे जानकारी लिनुभएको थियो।

अनुगमनका क्रममा उपत्यका ट्राफिक प्रहरी कार्यालयका प्रमुख तथा ट्राफिक प्रहरी अधिकृतहरूले काठमाडौं उपत्यकामा बढ्दो सवारी चाप, पार्किङ व्यवस्थापन, ट्राफिक नियम उल्लङ्घन, दुर्घटना न्यूनीकरणका लागि चालिएका कदम तथा प्रविधिको प्रयोगबारे गृहमन्त्रीसमक्ष प्रस्तुति दिनुभएको थियो।

सो अवसरमा गृहमन्त्री गुरुङले काठमाडौं उपत्यकाको ट्राफिक व्यवस्थापनलाई अझ व्यवस्थित, प्रविधिमैत्री र प्रभावकारी बनाउन निर्देशन दिनुभएको छ। उहाँले ट्राफिक नियमको कडाइका साथ कार्यान्वयन गर्न, सवारी दुर्घटना न्यूनीकरणमा विशेष ध्यान दिन र सर्वसाधारण नागरिकलाई सहज, सुरक्षित र व्यवस्थित यातायात सेवा उपलब्ध गराउनेतर्फ केन्द्रित हुन ट्राफिक प्रहरीलाई निर्देशन दिनुभयो।

उहाँले ट्राफिक व्यवस्थापन केवल प्रहरीको मात्र जिम्मेवारी नभई नागरिक, सवारी चालक, सम्बन्धित निकाय र स्थानीय तहको समेत साझा दायित्व भएको उल्लेख गर्दै सबै पक्षबीच समन्वय र सहकार्य आवश्यक रहेको बताउनुभयो। साथै, ट्राफिक व्यवस्थापनमा आधुनिक प्रविधिको प्रयोग बढाउँदै लैजान सरकार प्रतिबद्ध रहेको पनि उहाँले जानकारी दिनुभयो।

अनुगमनका क्रममा ट्राफिक प्रहरी कर्मचारीहरूको कामप्रति गृहमन्त्री गुरुङले प्रशंसा व्यक्त गर्दै सीमित स्रोत–साधनका बाबजुद ट्राफिक व्यवस्थापनमा खटिएका प्रहरी कर्मचारीहरूको भूमिका महत्वपूर्ण रहेको बताउनुभयो। उहाँले ट्राफिक प्रहरीको क्षमता अभिवृद्धि, आवश्यक उपकरण तथा स्रोत–साधन उपलब्ध गराउने विषयमा मन्त्रालय सकारात्मक रहेको पनि बताउनुभयो।

कार्यक्रममा उपत्यका ट्राफिक प्रहरी कार्यालय का प्रमुखसहित ट्राफिक प्रहरी अधिकृतहरू, गृहमन्त्रालयका प्रतिनिधिहरू तथा सम्बन्धित निकायका अधिकारीहरूको उपस्थिति रहेको थियो।