हाम्रो राष्ट्र
लुम्बिनी । लुम्बिनी प्रदेशमा नयाँ सरकार गठनका लागि नेपाली कांग्रेस संसदीय दलका नेता डिल्ली चौधरीले दाबी पेस गरेका छन् । बिहीबार उनले ५३ जना सांसदको हस्ताक्षरसहित प्रदेश प्रमुख अमिक शेरचनसमक्ष दाबी पेस गरेका हुन् । २७ पुसमा संविधानको धारा १६८ (२) अनुसार नेकपा एमालेबाट मुख्यमन्त्री बनेका लिला गिरीले ११ वैशाखमा प्रदेशसभामा विश्वासको मत नपाएपछि नयाँ सरकार पनि सोही धारा अनुसार गठन हुन लागेको हो ।
केन्द्रमा सत्ता समीकरण बदलिएका कारण माओवादीसहित पाँच दलले समर्थन फिर्ता लिएपछि गिरीले विश्वासको मत गुमाएका थिए । त्यसपछि प्रदेश प्रमुख शेरचनले संविधानको धारा १६८ को उपधारा २ अनुसार नयाँ सरकार गठनको लागि आज अपरान्ह ४ बजेभित्र दाबी पेस गर्न समयसीमा दिएका थिए ।
चौधरीलाई नेकपा माओवादी केन्द्रसहित जसपा, लोसपा, नागरिक उन्मुक्ति, जनमत, राष्ट्रिय जनमोर्चा, एकीकृत समाजवादी लगायतका दलको समर्थन छ ।
८७ सदस्यीय लुम्बिनी प्रदेशसभामा बहुमतका लागि ४४ सांसदको समर्थन चाहिन्छ । लुम्बिनीमा एमालेका २९, नेपाली कांग्रेसका २७, माओवादीका ११, राप्रपाका र नागरिक उन्मुक्ति पार्टीका ४(४ जना, जनमत पार्टी, जनता समाजवादी पार्टी र लोकतान्त्रिक समाजवादी पार्टीका ३(३ जना, राष्ट्रिय जनमोर्चा र नेकपा एकीकृत समाजवादीका एक(एक जना र स्वतन्त्र एक सांसद रहेका छन् ।
© 2026 All right reserved to hamrorastra.com | Site By : SobizTrend
