काठमाडौं, नेपालस्थित इजरायलको राजदूतावासले बिहीबार काठमाडौंमा एक भव्य स्वागत समारोह आयोजना गर्दै इजरायलको ७७औं स्वतन्त्रता दिवस र नेपाल–इजरायल कूटनीतिक सम्बन्ध स्थापनाको ६५औं वर्षगाँठ उत्साहका साथ मनाएको छ।

कार्यक्रमका प्रमुख अतिथि नेपालका उपराष्ट्रपति सम्माननीय रामसहाय प्रसाद यादव थिए। समारोहमा नेपाल सरकारका उच्च पदस्थ अधिकारीहरू, कूटनीतिक नियोगका सदस्यहरू, व्यवसायी, सञ्चारकर्मीहरू र विभिन्न क्षेत्रका विशिष्ट व्यक्तिहरूको उल्लेखनीय उपस्थिति थियो।

इजरायलका राजदूत शमुलिक एरी बासले स्वागत मन्तव्य दिँदै इजरायलको लामो यात्रा– संघर्ष, एकता र नवीनताबाट भरिएको इतिहासबारे चर्चा गरे। सन् १९६० जुन १ मा नेपाल–इजरायल कूटनीतिक सम्बन्ध स्थापना भएदेखि दुवै देशबीचको मित्रता झन बलियो बनेको उल्लेख गर्दै उनले भने, “इस्रायलको शक्ति जनताको आत्मामा निहित छ। नेपालसँग मिलेर हामी उज्यालो भविष्य निर्माण गर्ने प्रयत्नमा छौं।”

राजदूत बासले कृषि, शिक्षा, स्वास्थ्य लगायत विभिन्न क्षेत्रमा नेपाल–इजरायल सहकार्य विस्तार भएको जानकारी दिँदै विशेष गरी “लर्न एण्ड अर्न” कार्यक्रमअन्तर्गत ४,००० भन्दा बढी नेपाली युवाहरूले इजरायलमा आधुनिक कृषि तालिम प्राप्त गरिसकेको बताए।

कार्यक्रममा अक्टोबर ७, २०२३ मा हमासद्वारा इजरायलमा गराइएको आतंकवादी आक्रमणको पीडादायी स्मरण गरिएको थियो। त्यस घटनाबाट बाँच्न सफल नेपाली नागरिक धनबहादुर चौधरी र इजरायली नागरिक नोआ बीयरको मार्मिक भिडियो सन्देश प्रस्तुत गरिएको थियो। अपहरणमा परेका नेपाली बिपिन जोशीका दिदीको भावुक सन्देशले उपस्थित दर्शकहरूलाई निकै भावुक बनायो।

हिमाली बोर्डिङ स्कुलका विद्यार्थीहरूले इस्रायली झन्डाका रंगहरू र नेपाली परम्परागत पहिरनमा विशेष सांस्कृतिक नृत्य प्रस्तुत गर्दै कार्यक्रममा रमाइलोपन थपे। सहभागीहरूले इजरायली र नेपाली खानाको स्वाद लिँदै इस्रायल विषयवस्तुमा आधारित फोटो बुथमा फोटो खिचाउँदै रमाइरहेका थिए।

कार्यक्रममा प्रस्तुत गरिएको विशेष भिडियोले इजरायलको २,००० वर्ष लामो आशा, संघर्ष र मातृभूमिमा पुनः आगमनको प्रेरणादायी यात्रालाई देखाएको थियो, जसले इस्रायली जनताको अदम्य साहस र आत्मबललाई प्रतिबिम्बित गर्‍यो।

यस कार्यक्रममा “योम हाजिकारोन” (स्मृति दिवस) देखि “योम हात्स्माउत” (स्वतन्त्रता दिवस)सम्मको भावनात्मक यात्रा– दुःखबाट उत्सवसम्मको रूपान्तरणलाई सजीव रूपमा प्रस्तुत गरिएको थियो।