काठमाडौं : राष्ट्रिय स्वतन्त्र पार्टी का वरिष्ठ नेता बालेन्द्र शाहले सुदूरपश्चिमको धनगढीमा आयोजित सभामा आफ्नो पहिलो चुनावी सम्बोधन गरेका छन्। झापा–५ बाट प्रतिनिधिसभा सदस्य उम्मेदवार रहेका उनले परम्परागत चुनावी भाषणभन्दा फरक शैलीमा मन्तव्य व्यक्त गरेका हुन्।

बुधबार आयोजित कार्यक्रममा उनले आफू भोट माग्न नभई काम गर्ने अवसर माग्न आएको स्पष्ट पारे। उनका अनुसार राजनीतिमा मत माग्ने संस्कारभन्दा काममार्फत विश्वास जित्ने अभ्यास आवश्यक छ। “हामी भोट माग्न आएका होइनौँ, काम गर्न आएका हौँ,” भन्ने सन्देश दिँदै उनले मत नदिए पनि सुदूरपश्चिममा विकास र सुशासनका लागि आफ्नो पार्टी प्रतिबद्ध रहने बताए।

उनले नेपाल प्राकृतिक र सांस्कृतिक रूपमा समृद्ध राष्ट्र भएको उल्लेख गर्दै देशलाई अरूसँग तुलना गर्नेभन्दा आफ्नै सम्भावनाको उपयोग गर्नुपर्ने धारणा राखे। “नेपाल आफैंमा सुन्दर छ, स्रोत–साधनले सम्पन्न छ। यसलाई स्विजरल्यान्ड बनाउने नारा भन्दा यहाँकै सम्भावनालाई व्यवस्थित ढंगले प्रयोग गर्नु आवश्यक छ,” उनले भने।

राष्ट्रिय स्वतन्त्र पार्टीले उनलाई भावी प्रधानमन्त्रीका रूपमा अघि सारेको सन्दर्भसमेत कार्यक्रममा चर्चा भएको थियो। यद्यपि उनले छोटो र सारगर्भित मन्तव्य राख्दै सुशासन, पारदर्शिता र परिणाममुखी कामलाई आफ्नो प्राथमिकता बनाउने प्रतिबद्धता जनाए।

सभामा उपस्थित समर्थकहरूले परिवर्तन र जिम्मेवार राजनीतिप्रति अपेक्षा व्यक्त गरेका थिए। सम्बोधनको अन्त्यमा उनले नागरिकसँग सहकार्य र प्रत्यक्ष सहभागितामार्फत देशको विकास सम्भव हुने विश्वास व्यक्त गरे।