ललितपुर, ललितपुरको महालक्ष्मी नगरपालिका स्थित किस्ट मेडिकल कलेज एण्ड टिचिङ हस्पिटलमा हालै एमबीबीएस, बीडीएस तथा बी.एस्सी. एमएलटी कार्यक्रमका नयाँ विद्यार्थीहरूलाई स्वागत गर्दै अभिमुखीकरण कार्यक्रम सम्पन्न भएको छ। कार्यक्रममा एमबीबीएसको १८औँ ब्याच, बीडीएसको १५औँ ब्याच तथा बी.एस्सी. एमएलटीको ५औँ ब्याचका विद्यार्थीहरू सहभागी भएका थिए। कार्यक्रमले विद्यार्थीहरूलाई चिकित्सा शिक्षाको औपचारिक यात्रामा प्रवेश गराउँदै आगामी शैक्षिक सत्रका शैक्षिक तथा क्लिनिकल अपेक्षाबारे जानकारी प्रदान गरेको थियो।

कार्यक्रमको उद्घाटन गर्दै शैक्षिक इन्चार्ज डा. विजेश पी.डी. जोशीले नयाँ विद्यार्थीहरूलाई स्वागत गर्दै किस्टमा प्राप्त हुने शिक्षा र प्रशिक्षणले उनीहरूलाई दक्ष मात्र नभई संवेदनशील स्वास्थ्यकर्मीको रूपमा विकसित गर्ने विश्वास व्यक्त गर्नुभयो। उहाँले चिकित्सा शिक्षा केवल प्राविधिक ज्ञानमा मात्र सीमित नभई मानवीय संवेदनासँग जोडिएको पेशा भएको उल्लेख गर्नुभयो।

त्यसपछि डेन्टल कोअर्डिनेटर डा. रोशा श्रेष्ठले बीडीएस कार्यक्रमको शैक्षिक संरचनाबारे जानकारी दिँदै पाँच वर्षे पाठ्यक्रमसँगै छ महिनाको इन्टर्नशिप रहेको बताउनुभयो। उहाँले विद्यार्थीहरूले उच्च नैतिकता र व्यावसायिक मापदण्डलाई पालन गर्दै क्लिनिकल सीप विकास गर्ने अवसर पाउने बताउनुभयो।

कार्यक्रममा एकेडेमिक कोअर्डिनेटर प्रो. डा. किशोर सिंह बस्नेतले कलेजमा अध्ययनरत अन्तर्राष्ट्रिय विद्यार्थीहरूका लागि उपलब्ध सहयोगी प्रणालीबारे जानकारी दिनुभयो। उहाँले कलेजले विविध संस्कृतिका विद्यार्थीहरूलाई समेट्दै अन्तर्राष्ट्रिय वातावरणमा अध्ययन गर्ने अवसर प्रदान गर्ने र यसले विद्यार्थीहरूको ज्ञान तथा अनुभवलाई अझ समृद्ध बनाउने विश्वास व्यक्त गर्नुभयो।

त्यस्तै, अस्पताल निर्देशक प्रो. डा. सुरज बज्राचार्यले इमाडोलस्थित ३०० शैयाको शिक्षण अस्पतालका सुविधाबारे जानकारी गराउनुभयो। उहाँका अनुसार अत्याधुनिक डायग्नोस्टिक ल्याब तथा विभिन्न प्रकारका बिरामीहरूको उपचार प्रक्रियासँग प्रत्यक्ष संलग्न हुने अवसरले विद्यार्थीहरूलाई व्यवहारिक ज्ञान प्राप्त गर्न सहयोग पुर्‍याउँछ।

कार्यक्रममा किस्टमा उपलब्ध विभिन्न शैक्षिक कार्यक्रम तथा अध्ययनका अवसरबारे पनि जानकारी दिइएको थियो। विशेषगरी ५.५ वर्षे एमबीबीएस कार्यक्रम सबैभन्दा लोकप्रिय रहेको र यसमा भर्ना हुनका लागि विद्यार्थीले +२ विज्ञानमा कम्तीमा ५० प्रतिशत अंक प्राप्त गरी मेडिकल एजुकेसन कमिसन (MEC) को प्रवेश परीक्षा उत्तीर्ण गर्नुपर्ने व्यवस्था रहेको जानकारी गराइयो। यस्तै मापदण्ड बीडीएस तथा नर्सिङ कार्यक्रमहरूमा पनि लागू हुने बताइएको छ।

कार्यक्रमको समापनमा कलेजका प्रिन्सिपल प्रो. डा. बलमान सिंह कार्कीले धन्यवाद ज्ञापन गर्दै प्रतिस्पर्धात्मक MEC छनोट प्रक्रियामा सफल भई कलेजमा भर्ना हुन सफल भएका विद्यार्थीहरूलाई बधाई दिनुभयो। साथै उहाँले कलेजका शैक्षिक तथा क्लिनिकल पूर्वाधार, छात्रावास तथा विभिन्न विभागहरूको पूर्ण उपयोग गर्दै भविष्यमा उत्कृष्ट स्वास्थ्यकर्मी बन्न विद्यार्थीहरूलाई प्रेरित गर्नुभयो।