काठमाडौँ,

काठमाडौँ। स्वतन्त्र शैक्षिक परामर्श संघ नेपाल (फेकन) कार्यसमितिले शैक्षिक परामर्श व्यवसायीहरूको हकहित र व्यावसायिक सुरक्षाका लागि विभिन्न सरकारी निकाय तथा संसदीय दलहरूमा नीतिगत सुधारको माग राख्दै ज्ञापनपत्र बुझाएको छ।

फेकन टोलीले शिक्षा मन्त्रालयका उच्च शिक्षा महाशाखा प्रमुख तथा सहसचिव श्रीप्रसाद भट्टराई, शिक्षा सचिव चूडामणि शर्मा, शिक्षा मन्त्रीको सचिवालय, र कानुन मन्त्रालयमा ज्ञापनपत्र बुझाउँदै आफ्नो धारणा स्पष्ट पारेको हो। यसैगरी, टोलीले संसदको शिक्षा तथा स्वास्थ्य समितिका सभापति ओजस्वी सेरचन, राष्ट्रिय स्वतन्त्र पार्टीका सचेतक प्रकाशचन्द्र परियार, र नेपाल कम्युनिष्ट पार्टी (एमाले) का प्रमुख सचेतक ऐन महर लगायत नेपाली कांग्रेस एवं नेकपा संसदीय दलका प्रतिनिधिहरूलाई समेत भेटेर व्यवसायीका समस्याबारे अवगत गराएको छ।

ज्ञापनपत्रका मुख्य माग तथा प्रस्तावहरू:

व्यवसायीहरूको हितलाई ध्यानमा राख्दै फेकनले मुख्य गरी नियमावली र धरौटीका विषयमा देहायका प्रस्तावहरू अघि सारेको छ:

• प्रादेशिक मान्यता: प्रदेश सरकारबाट अनुमति लिएर सञ्चालनमा रहेका संस्थाहरूलाई पूर्ण मान्यता दिनुपर्ने।

• कार्यालय संरचनामा लचकता: नियमावलीमा व्यवस्था गरिएको भौतिक तथा कार्यालय संरचना सम्बन्धी मापदण्डमा लचकता अपनाउनुपर्ने।

• विद्यार्थी ट्र्याकिङ: विद्यार्थीहरूको ट्र्याकिङ (अनुगमन) प्रणालीलाई व्यावहारिक र लचिलो बनाइनुपर्ने।

• धरौटी सम्बन्धी व्यवस्था: व्यवसायमैत्री वातावरणका लागि धरौटी रकम र सोसम्बन्धी प्रावधान परिमार्जन गरिनुपर्ने।

सकारात्मक परिणाम आउने अपेक्षा, भोलि पुनः वार्ता

फेकनले आज भएका सबै छलफल, बहस र परामर्शहरू सकारात्मक दिशातर्फ उन्मुख रहेको जनाएको छ। यस पहलमार्फत शैक्षिक परामर्श व्यवसायीहरूको हकहितसँग सम्बन्धित कैयौँ महत्त्वपूर्ण मुद्दाहरू सम्बन्धित निकायसमक्ष प्रभावकारी रूपमा उठान भएको र व्यवसायमैत्री वातावरण निर्माण हुने आधारहरू क्रमशः बलियो बन्दै गएको संघले उल्लेख गरेको छ। निकट भविष्यमै यसको स्पष्ट र सकारात्मक परिणाम आउनेमा कार्यसमिति विश्वस्त देखिन्छ।

विशेष अपडेट: > आजको छलफलका क्रममा शिक्षा मन्त्रालयका सचिव चूडामणि शर्माले बाँकी रहेका प्राविधिक विषयहरूमा थप संवाद गरी निष्कर्षमा पुग्नका लागि फेकनको टोलीलाई भोलि बिहान ११ बजे पुनः छलफलका लागि आमन्त्रण गर्नुभएको छ।

फेकनले आफ्ना सम्पूर्ण सदस्यहरूको हक, हित र व्यावसायिक सुरक्षाका पक्षमा निरन्तर सक्रिय र प्रतिबद्ध रहने पुनर्पुष्टि समेत गरेको छ।