नेपाल र भारतबीचको शैक्षिक सम्बन्धलाई थप सुदृढ बनाउने उद्देश्यका साथ भारतको पञ्जाबस्थित प्रतिष्ठित देश भगत युनिभर्सिटी (DBU) का भाइस चान्सलर प्रोफेसर डा. हर्ष सदावर्तीले हालै नेपालको उच्चस्तरीय भ्रमण सम्पन्न गर्नुभएको छ । काठमाडौँमा आयोजित एक विशेष कार्यक्रमका बीच उहाँले नेपाली शैक्षिक परामर्शदाता, एजेन्ट तथा सञ्चारकर्मीहरूसँग अन्तर्क्रिया गर्दै विश्वविद्यालयको भावी शैक्षिक योजना र नेपाली विद्यार्थीहरूका लागि उपलब्ध अवसरहरूबारे विस्तृत जानकारी गराउनुभयो ।

पञ्जाब सरकारको देश भगत युनिभर्सिटी ऐन अन्तर्गत स्थापित यस संस्थाको जग प्रसिद्ध स्वतन्त्रता सेनानी सरदार लाल सिंह जीको राष्ट्रभक्ति र बलिदानको भावनामा आधारित छ, जसलाई सन् १९७२ मा भारत सरकारले ‘ताम्र पत्र’ द्वारा सम्मानित गरेको थियो । सोही गौरवशाली विरासत बोकेको यस विश्वविद्यालयले हालै मात्र भारतको प्रतिष्ठित शैक्षिक मूल्याङ्कन निकायबाट NAAC A+ को उच्च मान्यता प्राप्त गरेको छ, जसले यसको उत्कृष्ट शैक्षिक गुणस्तरलाई प्रमाणित गर्दछ ।

सञ्चारकर्मीहरूलाई सम्बोधन गर्दै भाइस चान्सलर डा. सदावर्तीले भन्नुभयो, “शिक्षा जीवनभर चलिरहने सिकाई प्रक्रिया हो । देश भगत युनिभर्सिटीमा हाम्रो मुख्य उद्देश्य युवाहरूको मस्तिष्कलाई सिर्जनशील बनाई उनीहरूलाई विश्व बजारमा प्रतिस्पर्धा गर्न योग्य नागरिकका रूपमा रूपान्तरण गर्नु हो । हामी नेपाली विद्यार्थी र अभिभावकहरूलाई उत्कृष्ट शैक्षिक वातावरणको ग्यारेन्टी दिलाउन चाहन्छौँ ।”

देश भगत युनिभर्सिटीमा इन्जिनियरिङ (CSE, AI, र साइबर सेक्युरिटी), व्यवस्थापन (Management), नर्सिङ, आयुर्वेद, होटल म्यानेजमेन्ट, कानुन, प्यारामेडिकल साइन्सेस, कृषि तथा फेसन टेक्नोलोजी जस्ता थुप्रै विधामा अत्याधुनिक र बजारमुखी पाठ्यक्रमहरू उपलब्ध छन् । विश्वविद्यालयमा डिजिटल तथा प्राविधिक पूर्वाधारको उच्च व्यवस्था हुनुका साथै विद्यार्थीहरूलाई प्रयोगात्मक र व्यावहारिक सिकाईमा जोड दिइन्छ ।

नेपाली विद्यार्थीहरूको उज्ज्वल भविष्य र करियरको ग्यारेन्टी गर्दै डा. सदावर्तीले विश्वविद्यालयको बलियो प्लेसमेन्ट नेटवर्कका कारण विद्यार्थीहरूले वार्षिक ५१ लाख भारतीय रुपैयाँ (INR 51 LPA) सम्मको आकर्षक रोजगारीको अवसर (प्याकेज) प्राप्त गरिसकेको उल्लेख गर्नुभयो । भाइस चान्सलर डा. सदावर्तीले नेपाली विद्यार्थीहरूलाई DBU परिवारको हिस्सा बनेर आफ्नो सपनालाई वास्तविकतामा बदल्न हार्दिक निमन्त्रणा समेत गर्नुभएको छ ।