हाम्रो राष्ट्र
बुटवल । लुम्बिनी प्रदेशमा जनता समाजवादी पार्टीबाट सरकारमा सहभागी भएको छ । सोमबार जसपाबाट नवनियुक्त मन्त्री भण्डारीलाल अहिरले पद तथा गोपनियताको शपथ गरेका छन् ।
प्रदेश प्रमुख अमिक शेरचनले अहिरलाई शपथ गराएका हुन् ।
मुख्यमन्त्री लिला गिरीको सिफारिसमा संविधानको धारा १६८ को उपधारा २ अनुसार कृषि तथा भूमि व्यवस्था मन्त्री नियुक्त गरेका थिए । यसअघि नियुक्त एमालेका एक मन्त्रीलाई विना विभागीय बनाएर जसपालाई सरकारमा सहभागी गराइएको हो ।
यसअघि सरकार विस्तारका क्रममा एमालेले मुख्यमन्त्रीसहित ५ मन्त्रालय लिएको थियो । त्यसमध्यबाटै जसपा सरकारमा आएको अवस्थामा एमालेले लिएको मन्त्रालयबाटै दिने भन्ने सहमति गरिएको थियो ।
त्यही सहमति अनुसार मुख्यमन्त्री गिरीले एमालेका कृषि तथा भूमि व्यवस्थामन्त्री तुलसीराम शर्मालाई मुख्यमन्त्री कार्यालयमै राखेर जसपाका संसदीय दलका नेता भण्डारीलाल अहिरलाई कृषि तथा भूमि व्यवस्था मन्त्रीमा नियुक्त गरिएको थियो ।
© 2026 All right reserved to hamrorastra.com | Site By : SobizTrend
