हाम्रो राष्ट्र
काठमाडौं : त्रिभुवन विश्वविद्यालय अन्तर्राष्ट्रिय क्रिकेट रङ्गशालामा जारी नेपाल प्रिमियर लिग (एनपिएल)को दोस्रो संस्करणअन्तर्गत आज बुधबार अपराह्न ४ बजे विराटनगर किङ्स र लुम्बिनी लायन्सबीच चर्चित तथा महत्वपूर्ण मुकाबला हुँदैछ। यस खेलले प्लेअफको तस्वीरलाई ठूलो मात्रामा प्रभावित गर्ने भएकाले दुवै टोली उच्च दबाबसहित मैदानमा उत्रने तयारीमा छन्।
कप्तान सन्दीप लामिछानेको नेतृत्वमा रहेको विराटनगर किङ्सले हालसम्म पाँच खेलबाट ८ अंक बटुल्दै प्रतियोगितामा बलियो दाबी प्रस्तुत गरेको छ। स्थिर कप्तानी, मजबुत बलिङ र निरन्तर प्रदर्शनका कारण विराटनगर आज पनि आत्मविश्वासका साथ मैदानमा देखिने अपेक्षा छ।
उता, रोहितकुमार पौडेल कप्तानी गरेको लुम्बिनी लायन्सले पाँचमध्ये दुई खेल मात्रै जितेको छ। प्लेअफको सम्भावना जीवित राख्न लुम्बिनीका लागि आजको खेल ‘कर या मर’ जस्तै रहेको छ। पराजय भएमा उनीहरूको यात्रा समूह चरणमै जटिल बन्नेछ।
विश्लेषकहरूका अनुसार दुवै टोलीका स्टार खेलाडीहरूको फर्म, कप्तानहरूको रणनीति र दवाबयुक्त क्षणमा निर्णय क्षमता नै आजको खेलको मुख्य निर्णायक तत्व हुनेछ। समर्थकहरू पनि उच्च प्रतिस्पर्धात्मक र रोमाञ्चक खेलको प्रतीक्षामा छन्।
बुधबार अपराह्न ४ बजे सुरु हुने यो खेलले एनपिएलको प्लेअफ समीकरणलाई झनै स्पष्ट पार्नेछ।
© 2026 All right reserved to hamrorastra.com | Site By : SobizTrend
