काठमाडौं, बीस वर्षको गौरवमय यात्रा पूरा गरेको अवसरमा ब्राडफोर्ड ग्लोबल (पूर्व ब्राडफोर्ड एजुकेशन कन्सल्टेन्सी) ले आज नयाँ बानेश्वरमा आफ्नो नयाँ कर्पोरेट मुख्यालयको औपचारिक उद्घाटन गरेको छ। संस्थाको २०औं वार्षिकोत्सवको अवसर पारेर गरिएको यो स्थानान्तरणले नेपाली विद्यार्थीहरूलाई विश्वस्तरीय अन्तर्राष्ट्रिय शिक्षासँग जोड्न दुई दशकदेखि खेल्दै आएको भूमिकालाई थप उचाइमा पुर्‍याउने विश्वास गरिएको छ।

ब्रान्डफोर्ड ग्लोबलका संस्थापक एवं मानार्थ विद्यावारिधिबाट सम्मानित पवन विष्टले आफ्नो टोलीका साथ नयाँ कार्यस्थलमा परम्परागत पूजा–आजा गरी उद्घाटन समारोहको नेतृत्व गर्नुभएको थियो। विश्वव्यापी शिक्षा क्षेत्रमा प्रख्यात व्यक्तित्व विष्ट एनरोलमेन्ट एडभाइजरी ग्रुप (EAG) को दक्षिण र दक्षिणपूर्वी एसियाका लागि उपाध्यक्ष र डिजिटल प्लेटफर्म एप्लाई ग्लोबलका अध्यक्ष समेत हुनुहुन्छ। इएजी (EAG) नेटवर्क मार्फत ब्राडफोर्ड ग्लोबलले नोभा साउथइस्टर्न युनिभर्सिटी, युनिभर्सिटी अफ ब्रिजपोर्ट, कोलोराडो मेसा युनिभर्सिटी र कन्कर्ड युनिभर्सिटी जस्ता प्रतिष्ठित संस्थाहरूमा विद्यार्थीको सिधा पहुँच पुर्‍याउँदै आएको छ।

एभरेष्ट होटलको अगाडि रहेको अघिल्लो कार्यालयबाट अहिलेको नयाँ स्थानमा गरिएको स्थानान्तरणलाई सेवा विस्तार र स्तरोन्नतिका रूपमा लिइएको छ। बिजुली बजार तर्फ १०० मिटर अगाडि एभरेष्ट बैंकको कर्पोरेट भवनको ठीक छेउमा रहेको यो अत्याधुनिक सुविधासम्पन्न कार्यालय वैदेशिक शिक्षा परामर्श, भाषा तयारी कक्षाहरू र भर्ना प्रक्रियाका लागि एकै छानामुनि सेवा दिने गरी डिजाइन गरिएको छ।

उद्घाटनका क्रममा विष्टले यो नयाँ भवन केवल एउटा कार्यालय मात्र नभई विगत २० वर्षमा हजारौं विद्यार्थी, साझेदार संस्थाहरू र सरोकारवालाहरूले देखाएको विश्वासको प्रतीक भएको बताउनुभयो। आफ्नो २०औं वार्षिकोत्सव मनाउँदै गर्दा विद्यार्थीहरूका अन्तर्राष्ट्रिय सपनाहरू साकार पार्न थप सहज र व्यावसायिक वातावरण प्रदान गर्न प्रतिबद्ध रहेको उहाँले उल्लेख गर्नुभयो।

सन् २००६ मा स्थापना भएदेखि नै ब्राडफोर्ड ग्लोबलले काठमाडौं बाहिर र संयुक्त राज्य अमेरिकाको क्यालिफोर्नियामा समेत आफ्नो उपस्थितिलाई विस्तार गरिसकेको छ। विष्टको नेतृत्वमा स्थानीय परामर्शदाताबाट विश्वस्तरमा मान्यता प्राप्त संस्थाको रूपमा विकास भएको यस मुख्यालयमा विश्वविद्यालय खोजी, भिसा कागजात मार्गदर्शन र भाषा तयारीका लागि विशेष विभागहरू रहेका छन्, जसले आगामी दुई दशक र त्यसपछिका लागि पनि संस्थालाई यस क्षेत्रको अग्रणी स्थानमा कायम राख्ने लक्ष्य राखेको छ।