काठमाडौँ – नेपालका शैक्षिक परामर्शदाता र अन्तर्राष्ट्रिय शिक्षा क्षेत्रका प्रतिनिधिहरूको छाता सङ्गठन, इन्टरनेसनल एजुकेसन रिप्रिजेन्टेटिभ्स इनिसियटिभ अफ नेपाल (IERIN – आईरिन) ले ‘नेपाल र विदेशमा उच्च शिक्षाको अवसर तथा चुनौतीहरू’ विषयक एक दिवसीय राष्ट्रिय अन्तर्क्रिया तथा छलफल कार्यक्रम सफलतापूर्वक सम्पन्न गरेको छ। उक्त विशेष कार्यक्रम बिहीबार, ११ जुन २०२६ का दिन काठमाडौँको थापाथलीस्थित ब्लुस्टार मलमा रहेको आरम्भ बैङ्क्वेटमा आयोजना गरिएको थियो। कार्यक्रममा प्रतिष्ठित शिक्षाविद्, उच्च शिक्षा व्यवसायी, नीति निर्माता, शैक्षिक प्रतिनिधि, विद्यार्थी तथा यस क्षेत्रका सरोकारवालाहरूको ठुलो उपस्थिति रहेको थियो, जहाँ नेपाल र अन्तर्राष्ट्रिय स्तरमा बदलिँदो उच्च शिक्षाको अवस्था, अवसर र विद्यमान चुनौतीहरूबारे गहन छलफल गरिएको थियो।

कार्यक्रमको मुख्य आकर्षणका रूपमा रहेको प्यानल सेसनमा शिक्षा र अन्तर्राष्ट्रिय विद्यार्थी भर्ना क्षेत्रका प्रतिष्ठित व्यक्तित्वहरूले आफ्नो धारणा राखेका थिए। प्यानलमा युनिभर्सिटी अफ हर्टफोर्डशायर (UH UAE-India) का निर्देशक डा. भानु कौशिक, द युनिभर्सिटी अफ एडिलेडका दक्षिण एसिया क्षेत्रका सिनियर म्यानेजर अनुप श्रेष्ठ, पर्यटन, आतिथ्य तथा शिक्षाविद् उज्ज्वल सत्याल, र काठमाडौँ विश्वविद्यालय स्कुल अफ म्यानेजमेन्ट (KUSOM) का सह-प्राध्यापक एवं सह-डीन डा. खगेन्द्र आचार्य सहभागी थिए। उक्त प्यानल छलफलको सहजीकरण इन्स्टिच्युट फर इन्टिग्रेटेड डेभलपमेन्ट स्टडिज (IIDS) की सिनियर प्रोग्राम एन्ड रिसर्च असिस्टेन्ट स्नेहा घिमिरेले गरेकी थिइन्।

छलफलका क्रममा प्यानलका वक्ताहरूले गुणस्तरीय उच्च शिक्षाको वास्तविक अर्थ, नेपाल र विदेशमा अध्ययनका अवसरहरू, विद्यार्थीकाे चाहना, शैक्षिक खर्चको व्यवस्थापन र रोजगारीको सम्भावना जस्ता महत्त्वपूर्ण विषयहरूमाथि प्रकाश पारेका थिए। वक्ताहरूले विद्यार्थीहरूको पूर्व-तयारी, उद्योग र शैक्षिक संस्थाबिचको साझेदारी, तथा आजको विश्वव्यापी बजारमा प्रतिस्पर्धा गर्न आवश्यक पर्ने व्यावहारिक सीप विकासमा विशेष जोड दिए। छलफलमा यो कुरा पनि प्रस्ट पारियो कि उच्च शिक्षाको छनोट केवल चलेका गन्तव्य देशहरूको लहैलहैमा लागेर भन्दा पनि विद्यार्थीको आफ्नै प्राज्ञिक रुचि, आर्थिक क्षमता र दीर्घकालीन करियरको लक्ष्यसँग मेल खाने गरी गरिनुपर्छ। साथै, शैक्षिक परामर्श क्षेत्रमा आचारसंहिताको पालना, सही परामर्श र शैक्षिक प्रणालीमा नवीनता ल्याउन सरोकारवालाहरू र नीति निर्माताहरूबिच बलियो सहकार्य आवश्यक रहेको कुरामा जोड दिइयो।

कार्यक्रमलाई सफल बनाउन विभिन्न स्वदेशी तथा अन्तर्राष्ट्रिय शैक्षिक संस्थाहरूले सहयोग तथा सहकार्य गरेका थिए। युनिभर्सिटी अफ हर्टफोर्डशायर र योर्क सेन्ट जोन युनिभर्सिटी कार्यक्रमको ‘एसोसिएट पार्टनर’ का रूपमा रहेका थिए। त्यसै गरी सफ्टवारिका कलेज, नेसनल एजुकेसन कन्सल्टेन्सी (NEC), एलबीईएफ क्याम्पस, एजु-ब्रिज, स्टडी स्क्वायर, रुटटुयुनी, युनिभर्सिटी अफ वोर्सेस्टर, र युनिभर्सिटी अफ इस्ट लन्डनले ‘एजुकेसन पार्टनर’ को रूपमा सहयोग गरेका थिए। कार्यक्रममा ब्रिटिस काउन्सिल आईईएलटीएस (IELTS Partner), आरम्भ बैङ्क्वेट (Hospitality Partner), र नबिल बैङ्क (Banking Partner) को समेत विशेष सहयोग रहेको थियो। प्यानल छलफलको समापनसँगै अतिथि वक्ता र सहयोगी संस्थाहरूलाई मायाको चिनो (Token of Love) प्रदान गरिएको थियो।

आईरिनका निवर्तमान अध्यक्ष हेमन्त भट्टराईको स्वागत मन्तव्यबाट सुरु भएको उक्त कार्यक्रमको समापन गर्दै नवनिर्वाचित अध्यक्ष योगेश क्षेत्रीले धन्यवाद ज्ञापन गरेका थिए। यो कार्यक्रम हालै निर्वाचित कार्यसमिति (कार्यकाल २०२६–२०२८) को पहिलो मुख्य सार्वजनिक कार्यक्रम समेत हो। नयाँ कार्यसमितिमा अध्यक्ष योगेश क्षेत्री, उपाध्यक्ष मञ्जु थापा धमला, महासचिव देवराज थापा, सचिव लक्ष्मण योन्जन, कोषाध्यक्ष कृष्णराज पोखरेल र कार्यकारी सदस्यहरूमा ओमप्रकाश उपाध्याय, सुजाता शेरपा, राकेश श्रेष्ठ र शशाङ्क पौड्याल रहेका छन् भने निवर्तमान अध्यक्षमा हेमन्त भट्टराई रहेका छन्। सन् २०१४ फेब्रुअरी २४ मा स्थापना भएको आईरिनले आगामी दिनमा पनि विद्यार्थीहरूको सुनौलो भविष्य र समग्र शैक्षिक परामर्श क्षेत्रको व्यावसायिक विकासका लागि यस्ता रचनात्मक कार्यक्रमहरूलाई निरन्तरता दिने प्रतिबद्धता जनाएको छ।