Participants in the Regional Aviation Safety Programme (RASP), with the Chargé d’Affaires of the EU Delegation, pose for a group photo at the CAAN office in Kathmandu on 23 June. The three-day programme brings together 45 regulators, operators and industry representatives from across South Asia.

काठमाडौँ, ९ असार (२३ जुन २०२६) — युरोपेली युनियन (EU) ले दक्षिण एसियाली क्षेत्रको उड्डयन सुरक्षा, सञ्चालन कूटनीति र नियमनकारी क्षमता अभिवृद्धि गर्ने उद्देश्यका साथ काठमाडौँमा दुईवटा ठूला क्षेत्रीय उड्डयन कार्यक्रमहरू सुरु गरेको छ।

‘EU–दक्षिण एसिया उड्डयन साझेदारी परियोजना’ (EU-South Asia APP) अन्तर्गत आगामी दुई हप्तासम्म सञ्चालन हुने यी कार्यक्रमहरूमा दक्षिण एसियाभरका उड्डयन प्राधिकरण, वायुसेवा कम्पनी, प्राविधिक विज्ञ र उद्योग प्रतिनिधिहरू सहभागी भई अनुभव आदानप्रदान तथा व्यावसायिक सञ्जाल सुदृढीकरणमा छलफल गर्नेछन्।

www.eeas.europa.eu

चालक दलको तालिम र सञ्चालन मापदण्डमा जोड

जुन २३ देखि २५ सम्म नेपाल नागरिक उड्डयन प्राधिकरण (CAAN) को आतिथ्यमा ‘क्षेत्रीय उड्डयन सुरक्षा कार्यक्रम’ (RASP) को तेस्रो मोड्युल सञ्चालन भइरहेको छ। फ्रान्सेली विमान निर्माता कम्पनी ‘एटीआर’ (ATR) सँगको सहकार्यमा आयोजित यस सत्रमा विमान चालक दलको तालिम (Crew Training) र उडान सञ्चालन मापदण्ड (Operational Standards) मा विशेष केन्द्रित भई छलफल भइरहेको छ।

यस मोड्युलमा उडान सञ्चालनका क्रममा आइपर्ने मानवीय र प्रक्रियागत पक्षहरू, जस्तै—निर्णय क्षमता, सञ्चालन लचिलोपन र थकान व्यवस्थापन (Fatigue Management) जस्ता महत्त्वपूर्ण विषयहरू समाविष्ट छन्। यसपटक क्षेत्रका वायुसेवा कम्पनीहरू आफैँले आफ्ना व्यावहारिक अनुभव र पाठहरू प्रस्तुत गर्दै उद्योगका विज्ञहरूसँग सहकार्य गरिरहेका छन्।

नेपालको प्रयासप्रति युरोपेली युनियनको सकारात्मक प्रतिक्रिया

कार्यक्रमको उद्घाटन सत्रमा बोल्दै नेपालका लागि युरोपेली युनियन डेलिगेसनका कार्यवाहक राजदूत (Chargé d’affaires) मिस्टर थॉमस मिलरले नेपाल सरकारका लागि हवाई सुरक्षा उच्च प्राथमिकताको विषय रहेको कुरालाई स्वीकार गर्नुभयो। युरोपेली आयोगका चासोहरूलाई सम्बोधन गर्ने गरी नेपालका अर्थमन्त्रीले हालैको बजेट भाषणमा राखेका प्रतिबद्धताहरूलाई ईयूले सकारात्मक रूपमा लिएको उहाँले बताउनुभयो।

“युरोपेली आयोगको चासो सम्बोधन गर्ने उद्देश्यका साथ अर्थमन्त्रीले बजेट भाषणमा गर्नुभएका टिप्पणीहरूलाई हामीले गम्भीरतापूर्वक लिएका छौँ,” कार्यवाहक राजदूत मिलरले भन्नुभयो। “साथै, सुधारात्मक कार्ययोजना (Corrective Action Plan) कार्यान्वयनको पूर्ण प्याकेज नेपालले हालै बुझाएकोमा हामी यसको सराहना गर्दछौँ। हाम्रा ‘डीजी मुभ’ (DG MOVE) का सहकर्मीहरूले आगामी महिनाहरूमा यसको विस्तृत समीक्षा गर्नेछन्।”

उहाँले नेपाली नागरिक र यहाँ यात्रा गर्ने सम्पूर्ण यात्रुहरूले उच्च स्तरको सुरक्षा पाउन सकून् भन्नका लागि ईयू र यसका सदस्य राष्ट्रहरू नेपाल सरकारसँग काँधमा काँध मिलाएर प्राविधिक सहयोग जारी राख्न तयार रहेको स्पष्ट पार्नुभयो।

‘कन्टिन्युइङ एयरवोर्दिनेस’ कार्यशाला पनि हुँदै

यसै सिलसिलामा, आगामी जुन २९ देखि जुलाई २ सम्म काठमाडौँमा ‘साउथ एसिया रिजनल इनिसिएटिभ’ (SARI) अन्तर्गत ‘रेगुलेटरी अपडे्टस इन कन्टिन्युइङ एयरवोर्दिनेस’ (Regulatory Updates in Continuing Airworthiness) कार्यशाला आयोजना गरिनेछ। यस कार्यशालामा युरोपेली युनियन उड्डयन सुरक्षा एजेन्सी (EASA) का पछिल्ला नियमहरू र आधुनिक नियमनकारी अवधारणाका बारेमा छलफल हुनेछ, जसले क्षेत्रीय उड्डयन निकायहरूलाई अन्तर्राष्ट्रिय मापदण्ड पालना गर्न मद्दत पुर्‍याउनेछ।

EASA – European Union

उड्डयन संवादको केन्द्र बन्दै नेपाल

यी लगातारका कार्यक्रमहरूले ‘EU-दक्षिण एसिया उड्डयन साझेदारी परियोजना’ व्यक्तिगत प्राविधिक आदानप्रदानबाट माथि उठेर एक परिपक्व र दीर्घकालीन क्षेत्रीय सहयोगको संरचनामा प्रवेश गरेको देखाउँछन्। यसले दक्षिण एसियाली क्षेत्रमै उड्डयन संवादका लागि नेपालको बढ्दो भूमिका र प्लेटफर्मलाई थप बलियो बनाएको छ।

युरोपेली युनियनको ‘ग्लोबल गेटवे’ (Global Gateway) रणनीतिको उद्देश्य अनुरूप सुरक्षित, दिगो र भरपर्दो हवाइ सञ्जालमार्फत पर्यटन र आर्थिक विकासलाई गति दिन यो सहकार्य फलदायी हुने विश्वास लिइएको छ।